Rodas de fricción

As rodas de fricción son un dos mecanismos de transmisión máis sinxelos que existen. Son discos que se tocan pola súa periferia. Ao apertalos un contra o outro, o rozamento entre os materiais fai que o xiro da roda motriz se transmita á roda conducida.

Cando dúas rodas están en contacto exterior pola súa periferia, xiran en sentidos contrarios: se a motriz xira no sentido das agullas do reloxo, a conducida xirará no sentido oposto.

No punto de contacto a velocidade é a mesma nas dúas rodas, porque se non patinarían.

v₁ = v₂

Diso sae a relación cinemática teórica:

n₁ · d₁ = n₂ · d₂

onde d é o diámetro de cada roda e n as súas revolucións por minuto.

Na realidade o rendemento da transmisión non é do 100 %: sempre hai un deslizamento que será maior canto máis grande sexa a potencia que se pretende transmitir.

É un sistema sinxelo e silencioso, pero ten un inconveniente: non pode transmitir grandes potencias, porque as rodas esvararían. Úsase en atraccións de feira, fotocopiadoras e en máquinas pequenas.